Madaxweyne ku xigeenka JSL Md Cabdiraxmaan Cabdilaahi Ismaaciil (Saylici) iyo weftigii uu hogaaminayey oo uu ka mid ahaa Gudoomiyaha Xisbiga Kulmiye Md Muuse Biixi Cabdi oo maalintii labaad ku sugan G/Awdal ayaa maanta ka qayb galay xaflad lagu soo bandhigay Musharixiinta xisbiga Kulmiye ugu tartami doona golaha deegaanka ee Degmada Boorame.

Wasiirka Cusub ee Wasaarada Warfaafinta iyo Wacyigelinta Somaliland Mudane Abiib Diiriye Nuur “Abiib Timacad” ayaa maanta si rasmi ah xilkii Wasaarada Warfaafinta ugal

wareegay Wasiirkii hore ee Wasaaradan Mudane C.raxmaan Yuusuf Ducaale “Boobe”.

Munaasibada xilwareejinta oo ka qabsoontay hoolka shirarka ee Wasaarada Warfaafinta,waxaa ugu horayn ka hadlay Agaasimaha Waaxda Idaacada Siciid Aadan Cige oo sheegay in Wasiirkii hore Mudane Boobe Yuusuf Ducaale uu wax badan ka qabtay mudadii koobnayd ee uu xilka wasaarada hayay,Waxaanu xusay inay Wasiirka Cusub iyo Wasiir ku xigeenka Wasaaradan loo soo magacaabay Mudane C.laahi Maxamed Daahir Cukuse ay la garab joogaan sidii ay ugu gacan siin lahaayeen hawlaha ay mas'uulka ka yihiin.

Agaasimaha Guud ee Wasaarada Warfaafinta C.rashiid Jibriil Yuusuf oo hadal kooban madashaasi ka jeediyay ayaa ka waramay waxyaabihii wasaarada warfaafinta u hirgalay mudadii uu wasiirka xilka wareejiyay soo maamulayay,waxaanu xusay inay Wasiirka iyo Wasiir ku xigeenka Cusub ee Wasaaradan loo soo magacaabay ay nasiib u heleen Xili ay tijaabo ku jirto idaacadii weynayd ee Radio hargaysa,waxaa kale oo uu agaasimaha Guud u mahadceliyay Injineerada iyo hawl wadeenada ku hawlan rakibaada cusub ee radio hargaysa.

Wasiirkii hore ee Wasaarada Warfaafinta iyo Wacyigelinta ee Jamhuuriyada Somaliland Mudane C.raxmaan Yuusuf Ducaale Boobe , oo hadal dheer goobtaasi ka jeediyay ayaa ugu horayn u mahad celiyay Madaxweynaha Jamhuuriyada Somaliland Mudane Axmed Maxamed Maxamud Siilaanyo oo xilkan u gartay isla markaana ka qaaday isagoo ku niyadsan,Wasiirkii hore ee Wasaarada Warfaafintu waxa uu sharaxaad ka bixiyay,hawl galadii waaweynaa ee wasaarada u hirgalay mudadii uu xilkeeda ku magacawnaa,kuwaas oo isugu jira dhagaxa qoran oo lagu sameeyay boqol mitir oo ka mid ah wajahada hore ee wasaarada,dayactir ay ku sameeyeen dhismaha idaacada radio hargaysa iyo mashaariic kala duwan oo ka socda wasaarada warfaafinta.

Mudane Boobe Yuusuf Ducaale waxaa kale oo uu faahfaahin ka bixiyay dhismayaal iyo qalabayn ay ka hirgaliyeen Telefishanka Qaranka iyo idaacada radio hargaysa.

Wasiir ku xigeenka Cusub ee Wasaarada Warfaafinta Mudane C.laahi Maxamed Daahir “Cukuse” ayaa tilmaamay inaanay wasaaradani ku cusbayn laakiinse uu mar ka soo qabtay xilkan uu maanta hayo waxaanu xusay inay uga mahadcelinayaan wasiirkii hore ee wasaaradan waxqabadkii uu suurto galiyay isagoo balan qaaday inay si cadaalad ah u gudan doonaan hawsha uu madaxweynaha jamhuuriyada somaliland u igmaday.

Dhinaca kale Wasiirka Cusub ee Wasaarada Warfaafinta iyo Wacyigelinta ee Jamhuuriyada Somaliland Mudane Abiib Diiriye Nuur “Abiib Tima cad” oo gunaanadkii xilwareejintaas ka hadlay ayaa sheegay in wasaarada iyo hawlaheeda uu ku cusub yahay isla markaana waxa uu xusay in hab cadaalad ah uu ku hagi doono wasaarada,waxaanu intaas ku daray inay muhiim tahay sidii cududa wasaarada loo muujin lahaa.

Munaasibadan waxaa kale oo goob joog ka ahaa la taliyaha Madaxweynaha ee arrimaha doorashooyinka Maxamed Muuse Abees,Gudoomiyaha Xafiiska Siyaasada ,Xidhiidhka Golayaasha iyo Madaxtooyada Bashiir Cabdi Xariir,Xildhibaano ka tirsan Golayaasha Qaranka iyo mas'uuliyiin kale.